Kokarin yaki da cin hanci da rashawa a Najeriya ta hanyar limaman masallatai
Kamfanin dillancin labaran kur’ani na iqna ya habarta cewa, ya nakalto daga shafin sadarwa na yanar gizo na The Nation Online cewa, Fouad Adimi babban daraktan gidauniyar Justis wanda ya shirya wannan horon tare da hadin gwiwar kungiyar al-Habibiya Islamic Society ya bayyana cewa cin hanci da rashawa babban kalubale ne da ke kawo tsaiko ga ci gaban Najeriya.
"Don yaki da cin hanci da rashawa a Najeriya, dole ne a sanya hannu a wuraren addini, don haka akwai bukatar a horar da limaman masallaci," in ji Adimi. Kungiyar Al-Habibiyah Islamic Society ce ta rubuta jagorar wa'azin.
Ya kara da cewa: “Mun zo nan ne domin kammala kokarin da malaman addininmu suke yi wajen tattauna matsalar cin hanci da rashawa a cikin al’ummarmu. Dukkanmu mun yarda cewa babbar matsalar da muke fama da ita a kasar nan, wadda ta kawo mana tsaiko da ci gabanmu, ita ce cin hanci da rashawa. Muna rokon malaman addininmu da su kara yin magana a kan yaki da cin hanci da rashawa, shi ya sa muka rubuta littafi kuma muna son mu yi musu jagora kan yadda za su yi amfani da shi.
"Muna da tabbacin wannan shirin zai yi tasiri sosai," in ji Adimi. Muna farawa kuma mun yi imani za mu sake karawa, in sha Allahu, ya kai ko’ina.
Cin hanci da rashawa a Najeriya ya jefa kasar cikin rashin ci gaba duk da yawan kudin da ake samu daga man fetur.
A shekarar 2021, kasar ta kasance a matsayi na 154 a cikin kasashe 180 da ke cikin jerin cin hanci da rashawa na Transparency International.
